شبابيك - محمد منير 1981
انتاج: شركة سونار
الأغانى:
توزيع موسيقى: فرقة يحيى خليل
الليلة يا سمرة
كلمات: فؤاد حداد - تلحين: احمد منيب
شبابيك
كلمات: مجدى نجيب - تلحين: احمد منيب
شجر الليمون
كلمات: عبد الرحيم منصور - تلحين: احمد منيب
كريشندو
كلمات: شوقى حجاب - تلحين: يحيى خليل
اشكى لمين
كلمات: بليغ حمدى وعبد الرحيم منصور - تلحين: بليغ حمدى
يا زمانى
كلمات: مجدى نجيب - تلحين: عزيز الناصر
ع المدينة
كلمات: عبد الرحيم منصور - تلحين: احمد منيب
الكون كله بيدور
كلمات: عبد الرحيم منصور - تلحين: حسين جاسر
كلمات الأغاني:
الليلة يا سمرا
الليلة يا سمرا يا سمارة
لا انا كنت برة ولا مهاجر
انا اللى جايلك من باكر
قلبى ولا البحر الهادر
عينى ولا الجمرة الليلة
خللى الندى من احلامك
يسقى النبات من ايامك
حطى اللى خلفك قدامك
تلقى البلد عامرة الليلة
الليل يصبح ويمسى
وتفكرينى وتنسى
شميت هواكى لقيت نفسى
يا طيبة وصابرة الليلة
البنت قالت فستاني
منشور على الشط التاني
خدني المراكبي وعداني
ورجعت في القمرا الليلة
ياللي صفيحتك بغوايش
عايش ولا لغيرك عايش
قلبي ولا البحر الطايش
عيني ولا الجمرة الليلة
دا العنجريب اللي قنيته
تمن سنين استنيته
على الجريد اللي رميته
هتزهر الثمرة الليلة
قال فينا غنوة وحدوتة
قال ما فيناش قولة توتة
ما هياش عجينة وملتوتة
كل القلوب حمرا الليلة
شبابيك
شبابيك.. الدنيا كلها شبابيك
والسهر والحكاية والحواديت
كلها دايرة عليك
والكلام كان.. كان عليك
واللي كان خايف عليك
انتهى من بين إيديك
سرقت عمري من أحزاني
سرقته، لكن ما جاني
ولا حد شاف فين مكاني
ورا الشبابيك
دا عينيكي.. شبابيك
الدنيا كلها.. شبابيك
غيرت ياما كتير أحوالي
ونا كنت عاشق..
عاشق وكان يحلالي
أحب بس يكون حلالي
ورا الشبابيك
دا عينيكي.. شبابيك
الدنيا كلها.. شبابيك
أنا بعت الدموع.. الدموع والعمر
طرحت جنايني في الربيع..
في الربيع الصبر
قلت أنا عاشق
سقوني كتير المر
ورا الشبابيك
دا عينيكي.. شبابيك
الدنيا كلها.. شبابيك
شجر الليمون
كم عام ومواسم عدوا
وشجر اللمون دبلان على أرضه
وفينك..
بيني وبيني وبينك
أحزان ويعدوا
بيني وبينك
أيام وينقضوا
وشجر اللمون دبلان على أرضه
وفينك..
أنا من غيرك
أنا مش عاقل ولا مجنون
أنا مطحون
والدنيا دي رحايا
وقلبي حب الحب
وحبابي عيون
وشجر اللمون دبلان على أرضه
وكل شيء بينسرق مني
العمر م الأيام
والضي م النني
وكل شيء حواليا يندهلي
جوايا بندهلك
يا ترى بتسمعني
وفينك..
كريشندو
قد البحر والسموات والارض
قد الحَب والفراشات والورد
قد ما خد م الازهار الخد
قد ما مد الاحباب اليد
قد وقد الدقات والنبض
قد وقد الاصوات والرد
وقد الشمس والانهار والمد
وقد الامـس قد شموس الغد
قد الخير اللى ما بينا سوا
والعصافير اللى تحب الهوا
حبيتك قد ده كله سوا
حبيتك وانتى عشانى هوى
اشكى لمين
اشكى لمين واحكى لمين.. دنيا بتلعب بينا
توهنا سنين ولا عارفين.. بكرة جايب اية لينا
بينا للفرح بينا.. قبل الجراح ما تدق بابنا
بينا دى الدنيا لينا.. بكرة الزمان يسرق شبابنا
لية هنضيع عمرنا ليه.. ايه راح ناخد من دا ايه
هما يومين مش دايمين.. مكتوبين علينا
نقضى ساعات فرحانين.. وساعات بتبكينا
لينا الفرحة لينا.. بالحب ننسى كل اللى فاتنا
ويا الرحلة الطويلة.. ننسى اللى فات كله فى حياتنا
دنيا بتلعب بينا ليه.. ايه راح ناخد منها ايه
ضحكتنا شمعتنا.. بينوروا ليالينا
خطوتنا ف رحلتنا.. بتقرب امانينا
لينا احلى امانينا.. لية الزمان يكسر قلوبنا
جينا ومادين ايدينا.. واللى يصيبنا اهو من نصيبنا
دنيا بتلعب بينا ليه.. ايه راح ناخد منها ايه
دنيا تدور، مهما تدور.. ماهى بتدور سواقينا
فى عطشنا فى ألمنا.. ما بتنساش تداوينا
لينا احلى امانينا.. لية الزمان يكسر قلوبنا
جينا ومادين ايدينا.. واللى يصيبنا اهو من نصيبنا
دنيا بتلعب بينا ليه.. ايه راح ناخد منها ايه
يا زمانى
يا زمانى اضحكلى.. اياك تنسانى
زمانى فى الغربة.. ونسيت عنوانى
يا زمانى على فين احزانى
يازمانى.. على فين واخدانى
وزمانى نادانى.. وفرشلى امانى
نسانى مكانى.. ونسيت خلانى
دا الحلم الوردى
مش طايلاه يدى
وصبحت انا وحدى
يا زمانى
وزمانى ليالى.. فى بحور واخدانى
وفى موجها العالى.. وحدى سيبانى
يا زمانى واخدنى
على فين اوعدنى
امتى تريحنى
ع المدينة
لفوا بينا قالو لينا.. قالوا بينا ع المدينة
لما جينا والتقينا.. كل شيء فيها ناسينا
القلق جوا العيون.. وشها له ألف لون
حزنها غير حزننا.. منها واحنا لوحدنا
فى المدينة هنا
لفوا بينا وجينا هنا.. لفوا بينا وتهنا هنا
يا مدينة فيكى ماشى.. قلبى قمراية بشواشى
مهما تعصرى قلبنا.. مش هيكدب صدقنا
فى المدينة هناك
لفوا بينا وجينا هنا.. لفوا بينا وتهنا هنا
الفصول فى كل عام.. فيكى تتغير قوام
روح يا قمر الليل ونام.. ده السكوت زى الكلام
فى المدينة هنا
لفوا بينا وجينا هنا.. لفوا بينا وتهنا هنا
ع المدينة..
الكون كله بيدور
الكون كله بيدور
واحنا وياه بندور
واليوم بحر نعدية
للى احنا بنحلم بيه
حبيبى مد ايديك
ده العالم ملك ايدينا
الكدب غيطان احزان
والصدق اللى مدفينا
احلى بكرة لينا
تحلى الذكرى بينا
طول ما احنا يا ناس عايشين
ما بنجرحش العاشقين
العمر ايام وسنين
بيعدى زى حكاية
يقولوها بكرة عاشقين
لياليهم مش نساية
احلى بكرة لينا
تحلى الذكرى بينا
طول ما احنا يا ناس عايشين
ما بنجرحش العاشقين
على جسر الليل ماشين
وقمر ليالينا مراية
ما بنعرف امتى وفين
هتكون للرحلة نهاية
احلى بكرة لينا
تحلى الذكرى بينا
طول ما احنا ياناس عايشين
ما بنجرحش العاشقين
