بنتولد - محمد منير 1980
انتاج: شركة سونار
الأغانى:
توزيع موسيقى: هانى شنودة
بنتولد
كلمات: عبد الرحيم منصور - تلحين: هانى شنودة
سيلى
كلمات: سيد حجاب - تلحين: احمد منيب
سؤال
كلمات: مجدى نجيب - تلحين: احمد منيب
سهيرة ليالى
كلمات: سيد حجاب - تلحين: احمد منيب
مدى ايدك
كلمات: عبد الرحيم منصور - تلحين: هانى شنودة
حلى ضفايرك
كلمات: سيد حجاب - تلحين: هانى شنودة
عروسة النيل
كلمات: عبد الرحيم منصور - تلحين: احمد منيب
بفتح زرار قميصى
كلمات: سيد حجاب - تلحين: هانى شنودة
غريبة
كلمات: مجدى نجيب - تلحين: هانى شنودة
اكلم القمر
كلمات: عبد الرحيم منصور - تلحين: هانى شنودة
كلمات الأغاني:
بنتولد
بنتولد طاهرين
بنتولد شبعانين
بنتولد متلهفين
على صدر أم وكتف أب.. مرتاحين
بنتولد باكين
بنتولد مش عارفين
بنتولد مش خايفين
واسمنا فى درب الحياة بنى ادمين
بنتولد دفيانين
بنتولد صافيين
بنتولد صادقين
كما زرعة خضرا فى أرض طين
زرعة حصادها حصاد عمر السنين
الحلو والمر والطيب والحزين
بنتولد مش داريين.. بالرايحين والجايين
نكبر، وتكبر بينا أعمار السنين
ونكره السنين وتكرهنا السنين
ونجرح البشر ونجرح نفسنا مع إننا بنتولد…
سيلى
سيلي يا نسمة وميلي
ع الحبيبة وسلميلي وارجعيلي
سيلي يا نسمة و قولي
ضمي قلب دهب و لولي
عمري ليكي روحي فيكي
ليكي شوقي وليكي ميلي
يا ابتسامة سمرة نيلي.. تسلميلي
يا حبيبتي الحب داري
وانتي نوري وانتي ناري
ده انتي انتي لما بنتي
بالهوا نورتي ليلي
يا ابتسامة سمرة نيلي.. تسلميلي
انتى قمرة فى ليل مدينتى
وانتى فى التوهة سفينتى
فى الليالى شايفة حالى
وانتى قنديلى ودليلى
يا ابتسامة سمرا نيلى.. تسلميلى
سؤال
سؤال بسألك إيه أخرة الترحال
وسهر الليالي وكل يوم بحال
سؤال بسألك ايه أخرة الأحزان
دمعتي موالي والحنيـن قتال
سؤال بسألك إيه أخرة الأحـلام
ليلاتى واخدانى فى بحر من الأوهام
سؤال بسألك إيه أخرة العذاب
تاعبني سؤالي ياريت ألاقي جواب
سهيرة ليالى
سهيرة ليالى، طايرين للعلالى
نجم الليل، بالليل يناديلنا، ويغنيلنا
في ليالي المدينة للأحباب نادينا
هلوا واتلاقينا، بالفرحة فى عينينا
ونجم الليل، صحى فى مواويلنا، شوقنا وميلنا
نجماية هوانا، سهرانة معانا
وقلوبنا الصبية بالحب ملالية
وهوا الليل، على شاله يشيلنا، وينزلنا
يا قمر الليالى ضوي لنا ولالى
الدنيا دى بيتنا، والاحلام شالتنا
واحنا الليل، دربنا وسبيلنا، وانتى دليلنا
مدى ايدك
مدى ايدك آدى ايدي..
ده الطريق زحام
خلى قلبك ويا قلبى..
هتهون الآلام
انا وانتى يا حبيبتى..
حلم من الاحلام
دى المدينة عيون حزينة..
ما بتعرف تنام
احنا عايشين جوا بعض
100 سؤال مالهمش رد
مدى ايدك يا حبيبتى
ده الحنين مالهش يد
الزحام ملو الشوارع
قلب رايح قلب راجع
عين تدور فى المفارق
على اللى راح منها وضايع
حلى ضفايرك
حلى ضافيرك للهوا
واتمايلى فى بحور الهوى
وغنى للحب اللى جمعنا سوا
خللى ضافيرك فى الهوا تطير.. تطير
ورفرفى للنسمة بالشعر الحرير
ولملمينى.. ولملمى قلبى الاسير
كسير، جريح، وانتى الدوا
حلى ضافير للهوا
مركب هوانا فى الهوا حلة الشراع
رايحين سوا لبلاد ما تعرفش الخداع
وداع يا ليل الحزن يا سنين الضياع
ضل الاسى داب وانطوى
حلى ضافيرك للهوا
حلى ضافيرك فى الهوا ويا القلوع
وخدينى ودينى لبلاد ما فيهاش دموع
وما دام ناوينا على الطريق ما فيناش رجوع
مهما الهوا زام واتلوى
حلى ضافيرك للهوا
بفتح زرار قميصى
بفتح زرار قميصي للنسمة و للأماني
و أنور فوانيسي و أملى العالم أغاني
باغنى للمحبة، وللنجم الملالى
دى الغنوة فى قلبى شابة، وطايرة فى العلالى
أه يا هوا يا سيسي إنت لساني وحصاني
بافتح زرار قميصي واملى العالم أغاني
بفتح زرار قميصي للنسمة و للأماني
و أنور فوانيسي وأملى العالم أغاني
باغني للسعادة، وباغني للرضا
والغنوة كل مادا، تعلى وتملى الفضا
أه يا هوا يا سيسي إنت لساني وحصاني
بافتح زرار قميصي واملى العالم أغاني
بفتح زرار قميصي للنسمة و للأماني
و أنور فوانيسي و أملى العالم أغاني
باغني للحقيقة وباغني للانسان
و غنوتي الرقيقة بتنورلي الزمان
أه يا هوا ياسيسي إنت لساني وحصاني
بافتح زرار قميصي واملى العالم اغاني
عروسة النيل
يا عروسة النيل يا حتة من السما
يالى صورتك جوة قلبى ملحمة
احنا لو مـرة نادينا
تجري على اصغر ما فينا
من ورا الليل والمعابد
والكنايس والمساجد
تحضنينا وتحكي لينا
تصغر الدنيا في عنينا
انتي يا شمعة يا قايدة في قلبنا
ياعروسة النيل ياحتة من السما
احنا ياعروسة شبابك
تكتبي نقرا كتابك
تتعبي بنشيل عذابك
تأمري بنكون جوابك
واحنا صافيين زيك انتي
انتي دايما باقية انتي
طاهرة زي الشمس صافية زينا
ياعروسه النيل
تعيشي يامصرنا
يا عروسة النيل يا حتة من السما
يا عروسة النيل تعيشى يا مصرنا
غريبة
غريبة غريبة، غريبة ومش غريبة
انى اكون ويا الحبيبة
دنيا مبتسمة ورحيبة
وفجأة اكون زى القلوع
ساعة الغروب مروحين
بلا شطوط ولا حنين
وانطفى فى الحال من غير سؤال
غريبة غريبة ، غريبة ومش غريبة
انى اكون فى لحظة مخيفة
خبر كان وسط الصحيفة
وفجأة اكون زى السطور المليانين
بحاجات كتيرة منورين
وانطفى فى الحال من غير سؤال
غريبة غريبة، غريبة ومش غريبة
انى اكون خطوة بريئة
لما ادور على الحقيقة
وفجأة اكون زى الجنون جوة العيون
مالهوش لون مالهوش كون
وانطفى فى الحال من غير سؤال
اكلم القمر
اكلم القمر.. تنوري
اكلم الشجر.. تزهري
و فى لحظة الضياع.. بترحلي
و فى لحظة السمر.. بتحضري
تتصوري.. تتصوري
اصاحب الدروب.. تتبسمي
اودع الغروب.. تتألمي
و فى لحظة الوداع.. تقربي
و فى لحظة اللقا.. بتبعدي
تتصوري.. تتصوري
تضيع منى الحروف.. تكملي
ألف ياما واشوف.. تتأملي
ويضيع منى الكلام.. تتكلمي
نرسم شكل الحياة.. و ترسمي
تتصوري.. تتصوري
