ابن البلد - الشيخ امام
الأغاني:
شيلنى واشيلك
كلمات: احمد فؤاد نجم - تلحين: الشيخ امام
يا ابن البلد
كلمات: احمد فؤاد نجم - تلحين: الشيخ امام
رشوا الملح
كسبت القضية
انا الاديب
كلمات: احمد فؤاد نجم - تلحين: الشيخ امام
بكرة الاتنين
لو علقولى مشنقة
كلمات: محمود الشاذلى - تلحين: الشيخ امام
صباح الخير
كلمات: احمد فؤاد نجم - تلحين: الشيخ امام
توت حاوى
كلمات: احمد فؤاد نجم - تلحين: الشيخ امام
كلمات الأغاني:
شيلنى واشيلك
شيلني واشيلك
دانا برضه فرحت لك
وأنا بتاعك يا بيه
واعرف ما اعرفش ليه
وكام عبد المعين
لابد في المسئولين
وأنا بتاع كل حاجه
ودراعك اليمين
وهتيف الوزير
وسواق المدير
ومهماز المدام
ونبوت الغفير
وفراش العياده
وخدام السياده
واللي من غير سناده
يتعكز ع السرير؟
وناس بدم ساقع
واقفين ورا البراقع
يميعوا المبادئ
ويفسروا الشرائع
وناس من خلف شيش
خايفين من الشاويش
سلبيه الميه ميه
تعالى لأ ما اجيش
دا كان كلام زمان
ما يبقالوش مكان
في مجتمع نضال
بيعجن الرجال
بالصهد والعرق
ولو حس الألم
يوشوش القلم
يصرخ ع الورق
يقول كل الكلام
عريان مايزوقوش
ويوصف الآلام
للي ما اتألموش
اصل احنا شعب طيب
والطيبة فينا بلوى
تاخدنا من قريب
وتجينا كلمه حلوه
سامعين يا اهل البلد
ولا امسك النفير
يا البنت يا الولد
يا المجدع الكبير
عارفين ماشيين منين؟
و السكه السالكه فين؟
مشوارنا مش هوين
وما هواش بالقليل
مهما الخيال يزين
لسه الطريق طويل
وع الطريق شكوك
وجبال حسك وشوك
صحصح يا عين ابوك
وامسك في إيد أخوك
عايزين همة رجال
أبعد من المحال
وأسرع من الأمل
تزلزل الجبال
وتفتح المجال
للعدل والعمل
ويطلع خير بلدنا
على ذمة ولادنا
وتبقى عيشه جنه
وملو الصحن حنه
على كفوف الصبايا
واعيش واشوف ولادي
ماليين عين الأعادي
قايمين للعز رايه
واقعد ويا الصحابة
ونقول على الربابه
يا جيل الإنجازات
يا جيل المحظوظين
أبوك السقا..مات
من شرب الميه طين
لو علقولى مشنقة
لو علّقولي مشنقة
أو حتى مليون مشنقة
حوالين رقبتي حافكّها
وآخذ حبالها وألفّها
وأصنع قلم يكتب حروف
متشوقّة لساعة خلاص
لو يزرعولى فِ سكتى
سكاكين تقطع خطوتى
ألغام تفرتك قوتى
مش راح يفوزوا بسكتتى
ولا يوم ح أتوب
حتى ان خدونى
وكفنونى بألف توب
أو حتى هدمة ممزقة
حأكتب بدمى على الكفن
أشعار بتحكى عن العفن
وعن الأمان اللى اندفن
ولا موت ح موت
حتى ان رمونى فِ التابوت
ودفنونى ف التراب
ح اكتب بعضمى ع التراب
اشعار بتحكى عن الولاد
قصة كفاح كل البلاد
وحعيش حياتي فِ دنيتي
واكتب واكتب كلمتي
بحروف أنين
متشوقة لساعة خلاص
بحروف كلام
صرخاته أقوى من الرصاص
توت حاوى
توت حاوي حاوي توت
خش اتفرج هرج فوت
زاحم لاحم عارك اضرب
ناضل فاضل
خطوة وتقرب
وإلحق نفسك
قبل ما يلعب
وامسك نفسك جوه الملعب
دانت حتضحك لما تموت
توت حاوي
حاوي توت
توت حاوي سبع مرات
لعبة جديدة
يا حضرات
دق الفول ويا الكرات
هات الشطه والبهرات
شخبط لخبط حضر طاسه وكب الزيت
ولع طلع ريحه مريحه ف جو البيت
ح تلقى عجينه عجيبة متينة
لا تقول تينه ولا برتينه
كل يا صنايعي
كل يا فقير
كل ماهو لسه الفول قناطير
آه يا سلام لو عود جرجير
تفضل تاكل لما تموت
توت حاوي
حاوي توت
توت حاوي حاوي توت
خش اتفرج هرج فوت
قعده فكيهه
حتسمع فيها
حكاية البيضة والكتكوت
يحكى أن
ولازم يحكى
وكان ياما كان
قبل الجنه
كان فيه بيضه وفرخه كمان
دبحوا الفرخه طبت سارخه
قامت البيضه طقت شارخه
طقشت فقست فرخ فصيح
يدن ويهلل ويصيح
حتى إن كان على وش دبيح
يفضل يدن لما يموت
توت حاوي حاوي توت
سحر مفيش دا كلام تهويش
نفض مخك يا ابو درويش
كل ما فيها الدنيا دي فيها
ناس بتبكش
لجل تعيش
حابس حابس
عفريت كابس
ينزل قالع يطلع لابس
واللي بيرقص
ع المسامير
واللي بإبره بيفحت بير
واللي بينفخ في المزامير
يفضل ينفخ لما يموت
توت حاوي
حاوي توت
