الملك هو الملك - محمد منير 1990
انتاج: شركة روكى
الأغاني:
كلمات: احمد فؤاد نجم
تلحين: حمدى رؤوف
على عليوة
شرم برم
طنوش
يامه مواويل الهوا
طفوا النور
عطشان يا صبايا
السبوع
حادى يا بادى
الله يا دايم
موال الصبر
تك تك
كلمات الأغاني:
على عليوة
علي عليوة.. يا للي
ضرب الزميرة.. يا للي
وضربها حربي.. يا للي
نطت في قلبي.. يا للي
قلبي رقاص.. يا للي
في بلاد الناس.. يا للي
والناس مجاريح.. يا للي
من عكس الريح.. يا للي
والريح هردانة.. يا للي
لا تبوح بأمانة.. يا للي
وامانة يا خلي.. تعشق وتقولي
على قصعة حنة.. يا للي
في جنينة حنا.. يا للي
حنا وزان.. يا للي
عند السلطان.. يا للي
سلطان هبوش.. يا للي
ابو ذمة فاشوش.. يا للي
السبحة في ايده.. يا للي
بيعد عبيده.. يا للي
وعبيده كتار.. زنهار زنهار
زنهار افراح.. يا للي
يكالوا التفاح.. يا للي
وصفوف مساكين.. ضايعين ضايعين
في الفرح ناسينا.. يا السلطان
وفي همة داعينا.. يا السلطان
يسرق ضحكتنا.. ويبوح غناوينا
غناوينا عذاب.. يا للي
م الباب للباب.. يا للي
وعذابنا حنان.. مش للسلطان
سلطان الشوم.. يا للي
سرق الفيوم.. يا للي
وخدوة محتار.. من الدار للنار
نصبوله الزار.. نصبولة الزار
شرم برم
شرم برم حالي غلبان
شرم برم حالي تعبان
دنيا غرورة وكذابة، لكن جميلة وجذابة
مجاريح ونعشقها صبابة
ادينا وادي حال الانسان
مجنونة خالص ترالالي
بكلمة تعزل وتولي
وفي لحظة تاخد ما تخلي
امان امان يا لالي امان
دلوعة ماشية بتتغندر
بين الامام والشهبندر
والغاوي قاعد يستنظر
حب العزيز يطرح رمان
يا حلم يا جناح المساكين
يا وعد من ورد البساتين
ملايين ربيع رايحين جايين
والكون حزين من غير الوان
طنوش
طنوش قالك طناش وما تعصلجلناش
تعملي فيها عنتر دا شيء ما يخصناش
بس البعيد هيتعب وهتبقي حالتة اصعب
خليك من حزب اشعب طنش تاكل بلاش
تنح قفاق وفقم وازرع وشك قوالح
ما تحطش المصالح ما بين خاصم وصالح
دا مفيش خصومة دايمة تفضل ع الوش عايمة
ولا القيامة قايمة الا في لحظة طناش
غفير وخالته داية لو مسكوه عصاية
ولبسوة عباية وحطوة ع المرايا
هيشوف اتخن امير ملعون ابو الفقير
وتسأل ع الاصول يقول ما شفتهاش
يامة مواويل الهوى
يا مه مويل الهوى
يا مه موايليا
طعن الخناجر ولا
حكم الخسيس فيا
سألت شيخ الطريقه
ما رضيش يجاوب سؤالي
ودارى عني الحقيقه
وفاتني حاير في حالي
سألت شيخ الأطبا
دوا الجرح إللي بيا
نظر لي نظرة محبة
وقال دوايا بايديا
يا مصر وإنتي الحبيبة
وإنتي اغترابي وشقايا
وإنتي الجراح الرهيبه
وإنتي إللي عندك دوايا
علمني حبك عبارة
سهلة وبسيطة وعفية
شرط المحبه الجسارة
شرع القلوب الوفية
طفوا النور
طفي النور
طفي النور يا بهيه
طفي النور
كله عساكر دورية
جوزك راجع من سوقه
راكبه الهم وبيسوقه
نطوا العسكر من فوقه
دورية ورا دورية
جوزك سارح على غيطه
بيلّضم همه في خيطه
قزحوا العسكر على حيطه
يلعبوا عسكر حراميه
خالك راجع من مكة
شايل سبحة ودربكة
طلعوا العفاريت في السكة
ألف ولاد الجّنية
ولدك رايح على عكا
يفتح سكه على سكه
طلعوا عليه سدوا السكة
واتحاصر رايحة وجاية
قيدي النور يا بهيه
كل العسكر حراميه
عطشان يا صبايا
عطشان يا صبايا
درب الهوى صعيب
والصحرا مديدة بعيدة
عطشان والمي قريب
عطشان.. عطشان.. عطشان
الخطوة عذاب ومتاهة
والحلم اخضر وعجيب
وانا كل ما اقول التوبة
ترميني المكاتيب
حبيبي يا نجمة ليلي
يا منورلي السراديب
مكتوب علي كف العاشق
روح بلدك يا غريب
دي الغربة في الزمان ده
تتونس بالحبيب
السبوع
حلاقاتك برجالاتك حلقة دهب في وداناتك
يا حنتوسك يا فنتوسك
يجعل عمرك قد فلوسك
جاتني الشمس وطالبة تبوسك
خاجلة من ضي ابتساماتك
حصنتك ما تشوف الذل بخرتك بخدود الفل
ورقيتك من عين الكل..
النبي حارسك من عتاراتك
قلعتك حرز.. لبستك حرز..
القامطة حرير والصوف ع الشرز
قلعتك طاقة.. لبستك طاقة
وكتبت حجابك علي وبر الناقة
يكفيك الشيم والعيا والضيق
وسكوت الناس وكلام العين
قلعتك قبة.. لبستك قبة
ابعد يا شيطان وتعالي يا شابة
لفيه وارقيه واسهري سليه
وفي برد اليل ضميه ودفيه
قلعتك عافية.. لبستك عافية
ورميت هلاهيلك في الميه الصافية
وغسلت ذنوبك وقريت مكتوبك
السعد مواعدك والهنا محسوبك
يارب يا ربنا.. يكبر ويبقي زينا
طق الودع سحر وبدع
سعد السعود في ارضنا
تاتا تاتا خط العتب..
ودوس على كل العتب
واللي انقرى واللي انكتب
واسرح في نعمة ربنا
يارب يا ربنا يكبر ويبقي زينا
خد البشارة يا حسن
وافتحلنا الفال الحسن
وابعت على عيونه الوسن
نوم العوافي والهنا
نام نام نام نام.. وادبحلك برجين حمام
واعملك طاجن وبرام
واقعدلك سهران ما بنام
واغزلك زعبوط وحرام
واخطبلك بنت من الشام
واقطفلك ورد الاحلام
واكتبلك ع الورد كلام
حسادك بايتين الليل
يتلووا على نار الويل
سهرهم ودموعهم سيل
شتتهم لو جالك ميل
واتحصن منهم بالخيل
وملايكة شايلينك شيل
حادى يا بادى
-حادي يا بادي يا ظهر النادي فكرك ايه
عمك شنطح جالك ينطح تديلة ايه
-اديلة قطفة
-تديلة قطفة قطفة ايه
-قطفة ما قطفة فكرة وخاطفة
امال قولي لو انت يا خلي
عمك شنطح جالك ينطح تديلة ايه
-كان يا ما كان
-كان دلوقتي ولا زمان
-ماهو دلوقتي زي زمان
كانو جماعة في ارض وسيعة
فيها طبيعة وناسها الصافية
تروي الصحرا بعرق العافية
الارض الساكتة تبوح بساتين
-الله الله
-قمح وياسمين
-يا ما شاء الله
-والناس عايشين
-بما يرضي الله
الله يا دايم
الله يا دايم هو الدايم ولا دايم غير الله
آه يا زمان كداب يا زمان في الحدوتة وفي العنوان
دنيا مظاهر عايشة الظاهر والقفطان هو السلطان
حطوا الخوصة على الخوصة فوق البوصة المفعوصة
تتقمع تبقي عروسة
تتمنظر على غصن البان
واحد حل واحد ضيف نط الحل سأل ضيفه
حذر فذر تقدر كيف تعرف عنتر من خوفه
بات الضيف على حد السيف يتقلب مش عارف كيف
شغل مخه وفرشه وهرشه.. وفرده ولمه وشمه وقرشه
قولي يا مخ يا صنع الكيف زي ما بين الشتا والصيف
فين الفارق والشتان بين الفارس والسلطان
سنفر مخه وقشره وبشره وخربه وظبطه وشاله وخبطه
تعب الضيف من لعب السيف.. غنى يا عين ويا لالي كمان
جاله الهاتف ليلة صيف فوقه مراية وتحته حصان
ابيض في ابيض زي الطيف قاله يا غافل يا غلبان
عنتر هو جراب السيف والسلطان حشو القفطان
موال الصبر
أمر من الصبر سؤلانك لغير مولاك
يصفر لونك وقليل ان سمح وعطاك
الندل صاحب قليل البخت واتواعدوا
يمشوا رفاقة بطول العمر ما يباعدوا
وفى الاصيل زي الغمامة بوعده
والندل غير طريقة والزمن اهو ساعده
وبعده لسة الخيانة سايرة في الافلاك
تك تك
-تك تك.. تك تك
-مين
-تين على لوز
-لأ لوز على تين
تين علي لوز أو لوز على تين
كلة مغطي القمر الدين
توتة توتة يا تحت التوتة
دي الحدوتة والسامعين
إدي قول للنار لا تخلي لما تولي على ظالمين
كان ياما كان
في زمان ومكان كانوا تلاتة من التلاتين
جمع شين على زين الدين عملوا مؤامرة على الباقين
اصل الشيللو بيشبة لله حتى حمار الزبالين
بعد ما شالوا حطوا وغطوا ناموا وغطوا ومش خايفين
قامت قومة في عز النومة لا خلت كاف ولا شين ولا زين
توتة توتة دي الحدوتة وادي التوتة والسامعين
