جدف يا مراكبى - محمد حمام
انتاج: شركة نجمة العتبة
الأغاني:
كلمات: عبد الرحمن الابنودى - تلحين: ابراهيم رجب
بلاش
جدف يا مراكبى
قولى لعين الشمس
يا بيوت السويس
العنب
اه يا ليل يا ليل
يا شمس غيبى يا مراكب حلى
كلمات الأغاني:
بلاش
يا بلاش يا تداوى جروحى يا بلاش
جميل في رسمك عرض وطول
ما جرحني الا عيونك دول
اصل المحبة مش بنقول
يا تداوي جروحي يا بلاش
اشكيك لمين يا ابو امر عجيب
يا ابو الكلام معنى وترتيب
دوايا في عيونك يا طبيب
يا تداوي جروحي يا بلاش
يا ابو الخدود التفاحي
الناس تنام وافضل صاحي
سهران على ضي جراحي
يا تداوي جروحي يا بلاش
يا ابو العيون حلوين ظالمين
حوشت الدوا يا بخيل يا ضنين
كل اللي شافني قال مسكين
يا تداوي جروحي يا بلاش
جدف يا مراكبى
جدف يا مراكبي وع البر التاني رسينا
والنبي لتزود السرعة بس اوعى تغلط في المينا
في الشمس الحمرا اسمرينا وفي ليل الغربة مرينا
وجينالك يا مراكبي يا عترة قاصدينك لجل تودينا
في النسمة الجلع بيتطوح وحمام المغرب بيروح
يا مراكبي يا صاحبي يا بلديا من البعد عيوني بتنوح
الليل لو ليل انا صاحي سهران بتنوسني جراحي
اضرب مجادفيك في المية يالا وقرب من افراحي
والنبي لتزود السرعة بس اوعى تغلط في المينا
وجدف يا مراكبي وع البر التاني رسينا
قولى لعين الشمس
قولوا لعين الشمس متحماشي
الا غزال البر صابح ماشي
لما تقرب هللة قولولها رشي الضلة
كل ولاد البلد واقفين ولد ولد
بيودعوا القمر
ويمامة طايرة هناك محتارة م الشباك
من المدنة للشجر
والورد في البستان سالني ع العنوان
في الليل غنوا سوا
وملوا الليل بالهوا ورقصوا النجوم
ومراكبي في مركبه شوق قلبه دوبه
عام في المحبة عوم
وفرد رمشه قلوع عدت بحر الدموع
قالت لعين الشمس متحماشي
يا بيوت السويس
يابيوت السويس يابيوت مدينتي
استشهد تحتك وتعيشي انتي
يابيوت السويس
يابيوت السويس
هيلا هيلا هيلا يالله يابلديا
شمر درعاتك الدنيا اهيه
وإن باعوا العمر في سوق المنية
رفاقة هانروح السوق نجيبه
ونعود ونغني ع السمسية
ليكي يامدينتي
ياللي صمدتي
يابيوت السويس
استشهد والله ويجيى التانى
فداكي وفدا اهلي وبنياني
اموت وياصاحبي قوم خد مكاني
دا بلدنا حالفة ماتعيش غير حرة
قفلت بيتي وسكيت دكاني
ياشطي وبحري وشبكي وسفينتي
يابيوت السويس
يابيوت السويس
والله بكرة ياعم ابورية
لهاتضحك واحنا ماشيين سوية
ع المينا ولا عند الزيتية
وهاتاخد ابنك وبنتك ومراتك
ونعدي على نفس لمعدية
ونقول يادنيا والله وصدقتي
يابيوت السويس
يابيوت السويس
وان عشنا وانا كنت شديد متعافي
أنا لأحمل توبك على لحم كتافي
وأقضي يومي عرقان وحافي
وإن قدمي اتعفر بالرمل الأصفر
لأغطس قدمي ف البحر الصافي
وتعودي احسن من يوم ماكنتي
يابيوت السويس
العنب
العنب طاب العنب
لاقول للخولي طاب العنب
يا سمرة صوتك جوايا
سامعه في روحي في غنايا
انا القمر وانتي سمايا
وانا العليل وانتي دوايا
يا لقمتي وتوبي وقصري وضحكتي
قولي معايا طاب العنب
لاروح على الخولي واقوله
كرم العنب طايب كله
خد مالي خد عمري كله
وقرب الخل لخله
ده انا ليا سنتين
بستانك مقدرش ما اعودش لضله
العنب طاب العنب
لاقول للخولي طاب العنب
اه يا ليل يا ليل
اه يا ليل يا ليل ياما حلمنا وبات الحلم يا ليل
ونشترى الحلم غالى حلمنا يبعنا يا ليل
اوعوا تقولوا سرايا قزاز ومية فدان
ولا اني بحلم اكون باشا او اكون سلطان
انا حلمي بيت اخضراني وباب خشب وحيطان
ووليف ينور حياتي ضحكته وجمال
ولا اذا شافنا يجري علينا ويبوسنا يا ليل
يا شمس غيبى يا مراكب حلى
يا شمس غيبى يا مراكب حلى
دي بلاد بعيدة وخاطري في محلي
يا طير يا معدي سلم على الحبان باليد
سامعك صدقني سامعك
سامعك في وسط القلب صوت بينادي
واقول ده صوت محبوبي ولا بلادي
وانا بعيد صدقني ما بتعذب
ده انا العذاب بيزيدنى كل ما اقرب
دمعك لسوعني دمعك
يا قلع لا تضحك في حزني جاملني
مستحملك في الرحلة استحملني
واهرب لفين يا خلق من المكتوب
اهرب لفين والقلب فيه محبوبي
بايعك فاكرني بايعك
يا شمس غيبى يا مراكب حلى
دي بلاد بعيدة وخاطري في محلي
