ايوب - بحر ابو جريشة 1999
انتاج: شركة صوت الدلتا
الأغاني:
ايوب
كلمات: احمد المستشار - تلحين: فتحى جمال
ابو الاشواق
كلمات: احمد المستشار - تلحين: فتحى جمال
ارتاح يا قلبى
كلمات: عبد الرزاق ضيف الله - تلحين: عبد الحميد الصياد
يا شاغل بالى
كلمات: احمد المستشار - تلحين: بحر ابو جريشة
شجر الليمون
كلمات: احمد المستشار - تلحين: فتحى جمال
يا طير ياللى طاير
كلمات: احمد المستشار - تلحين: فتحى جمال
كلمات الأغاني:
ايوب
أيوب زمانك راح
وبقيت أنا أيوب
لما ابتليت بجراح
صابر على المكتوب
أيوب يا أبو الصابرين
م الصبر أنا مليت
أشكي عذابي لمين
كل البلاد لفيت
الجسم شوك دبلان
شايل جبل أحزان
وبقيت أنا أيوب
صابر على المكتوب
أيوب زماني أنا
أيوب.. أنا ملاح
والبحر ماله حدود
فارد شراعي جناح
ماشي في طريق مسدود
صابر مع الصابرين
تايه مع التايهين
وبقيت أنا أيوب
صابر على المكتوب
أيوب زماني أنا
أيوب.. جابولي طبيب
قالوا عليل نداويه
وناس بتقرا الغيب
قالوا الحبيب يشفيه
لا شفت جنبي حبيب
ولا داواني طبيب
وبقيت أنا أيوب
صابر على المكتوب
أيوب زماني أنا
ابو الاشواق
يا شوق يا أبو الأشواق
طايرين مع العشاق
بعيون بريئة يا شوق
طايرين معاهم لفوق
حاسين لنا جناحين
ليهم يا شوق رايحين
والفرحة تبقى اتنين
وياك يا نور العين
خطوة تاخدنا لبعيد
للهفة للتنهيد
يا شوق يا أبو الأشواق
يا شوق ليلاتي معاك
نسهر ونفرح بيك
دنيا الغرام دنياك
والود جوه عنينيك
خد إيدنا وصلنا
ع الحب كلمنا
يا شوق يا أبو الأشواق
يا شوق أمانة تجيب
أيامنا بالأفراح
والحزن عنا يغيب
وتداوي كل جراح
نلقاك في أحلامنا
في سكوتنا في كلامنا
يا شوق يا أبو الأشواق
ارتاح يا قلبى
ارتاح يا قلبي ارتاح
وانسى اللي عدى وراح
تعالى نعيش ليالينا
كفاية عذاب وجراح
افرح يا قلبي وسيبك
وسيب اللي يسيبك
واللي يسيبك في الحيرة
يا قلبي مش حبيبك
يا قلبي الدنيا جميلة
تعالى نعيش ليالينا
حرام تعدي ليلة
من غير ما نحس بيها
لسة الحياة قدامنا
تعالى نعيش أيامنا
اضحك للدنيا يا قلبي
تصفى لنا الدنيا وتحلى
يا شاغل بالى
سألت عليك يا شاغل بالي
سهرت العين والله ليالي
إنت المحبوب قسمة ومكتوب
وإزاي أروح أتوب قولي يا غالي
بالك مع مين وزهور وورود
أنا تهت سنين في عينيك السود
مشتاق لعينيك بداري عليك
أنا دايب فيك يا شاغل بالي
يا شاغل بالي أنا قلبي معاك
لو رحت بعيد عمري ما هنساك
لو عمري راح في بلاد سواح
عمري ما هنساك يا شاغل بالي
أنا شفت كتير زيك ما لقيت
وصبحت أسير والله وحبيت
بتمنى صفاك بتمنى لقاك
ليه بس جفاك يا شاغل بالي
شجر الليمون
حلو يا للي لمونك فوق الشجر مايل
بتبكي م اللي لامونا والدمع سيل سايل
دبلت يا عيني عيونك
والبخت آه مايل
يا حلو قول للناس
ليه تداري إحسانك
قلب رقيق حساس
لكن الحبيب خانك
عاشق وبختك ومال
سهران ليالي طوال
والبخت آه مايل
الحزن شفته سنين
والفرح شفته يومين
عيني عليك مسكين
تايه ما بين شطين
ماشي غريب الدار
قلب الحبيب غدار
والبخت آه مايل
يا حلو ياللا ارتاح
العمر مش دايم
دور على الأفراح
وابعد عن الظالم
هات للعيون فرحة
جوه القلوب سارحة
يا طير ياللى طاير
يا طير ياللي طاير
يا مسكين يا حاير
تخلف بي ليه وتدور
بتعدي ليه بحور
ويمر عليك شهور
ومستني البشاير
يا طير لفين النية
في السكة ألف دليل
خايف تروح يا عينيا
وتتوه ما تلقى سبيل
ترجع يا طير مجروح
فوق غيتك وتنوح
تحلف ما تاني تروح
وما عدت تاني تطير
يا طير كفاية يا طير
يا طير ده والله حرام
بتحوم يا طير ع الغير
وتشوف عذاب وآلام
ده الغير يا طير غشوك
رموك في وسط الشوك
أبدا ما يوم حبوك
كان ليه يا طير بتطير
ويا طير أمانة استنى
فايت وليفك ليه
ده معاه هتلقى الجنة
والفرحة مالية عينيك
املى طريق نور
فل وريحان وزهور
جنبك هتلقى طيور
في الكون ده لسة بخير
