نقطة الضعف - فايزة احمد 1979
انتاج: شركة صوت الفن
الأغاني:
نقطة الضعف (غصب عنى)
كلمات: عبد الوهاب محمد - تلحين: محمد سلطان
كلمات الأغاني:
نقطة الضعف
غصب عني يا حبيبي
مهما اقول هبعد واخبي
القى روحي باحن لك
واشتاق لحبي غصب عني
غصب عني كمان بصدق حسن ظني
واطوي شكي فيك وحيرتي في التمني
واعمل ايه وياك وحبك اقوى مني
قد ما ارادتي قوية
قد ما دموعي أبية
نقطة الضعف اللي فيا
هي قلبي وانت قلبي
اشتياقي يا حياتي وانت غايب
اشتياق فوق اشتياق كل الحبايب
بس عزة نفسي بتخليني اداري
واقدر اصبر وابتسم في عز ناري
يجرى ما يجرى ومحدش عنده فكرة
والحقيقة اني بدوب لهفة وحنين
وانتظار على نار وافكار حيرانين
بتغالبني الوحدة وانا مع ناس كتار
ويصاحبني السهد حتى بالنهار
والدقيقة تمر عليا سنين كتار
كل ده وانت بعيد
واما بتعود من جديد
كل ثانية تبقى عيد
الحياة بترد فيا والسماح يغلب عليا
قد ما ارادتي قوية
قد ما دموعي ابية
نقطة الضعف اللي فيا
هي قلبي وانت قلبي
نقطة الضعف اللي فيا عذبتني
حملتني فوق ما يقدر حد يتحمل ضنا
وصلتني اعيش لك انت وانسى حتى مين انا
وامشي ورا قلبي وغرامه في الضلوع
زي طيران الفراشة ع الشموع
بعرف اني اروح ومعرفش الرجوع
عايز اكتر من كده ايه
انت شفت الحب ده الا معايا
ليه ما بتقدرش ليه؟
وانا م البداية بحبك حب لسه ما اتعرفشي
واخاف ع الحب مين حب وما خافشي
يا حبيبي يا حبيبي
زي موج البحر ما بيرجع لبحره بعود اليك
يا حبيبي يا حبيبي
زي ما يخاف اللي تاهت نفسه منه بخاف عليك
واعمل ايه لما عواطفي بتعاندني وبتراضيك
اعمل ايه وانا سر ضعفي رأفة بيك من حبي فيك يا حبيبي
نقطة الضعف اللي عندي كان منايا تبقى عندك
واللي بشعر بيه لوحدي
انت تشعر بيه لوحدك
كان منايا يا منايا يغيرك عطفي وحناني
كان منايا تبقى أرحم ما فى زماني
بس يا خسارة التمني عاش تمني
والحياة ما بتديناش كل الأماني
قد ما إرادتي قوية
قد ما دموعي أبية
نقطة الضعف اللي فيا
هي قلبي وانت قلبي
